Red Velvet Cheesecake Brownies

أنا نقطة ضعفي دائما الحلويات وبالذات البراونيز، دائما أسوي البراونيز ودائما أهلي يطلبوها لو آخر اللي ما عندي مشكلة أبدا، أدخل المطبخ وأسويها. بس اللي أسويها دائما هي البراونيز الجاهزة تبع بيتي كروكر في حياتي ما جربت أسوي براوني من الصفر، والسبب إني ما قد لقيت وصفة لذيذة وسهلة كل الوصفات تحتاج حوسة، ومهما يحوس الواحد إلا ما تطلع بالأخير كأنها كيكة عادية، فأسهل شي ممكن هو بيتي كروكر أخلطها في خمس دقايق وأدخلها الفرن. 

هالمرة شفت فيديو Laura Vitale أفضل وحدة في لقيتها في اليوتيوب دائما وصفاتها مرة سهله والطعم شي خرافي والله ما أمزح وصفاتها لذيييذة ❤️❤️. المهم شفت فيديو للبراونيز العادية بعدين شفت فيديو هالوصفة وانصدمت من جمال الفكرة (ريد ڤلڤت براونيز بنكهة التشيزكيك) ٣ في ١ وسهلة مرة حتى أسهل من البراونيز العادية. ومن تجربتي السابقة لوصفات لورا متأكدة تماما إنه طعمها بيكون جميل حتى لو إنها دسمة مو مشكلة نزيد نص ساعة تمارين 😁. 

المقادير: 

* للبراونيز

- إصباع زبدة
- كوب سكر
- بيضتين
- ٣ ملاعق شوكلاته بودرة
- ٣/٤ كوب دقيق أبيض
- لون أحمر (على حسب الرغبة)
- ملعقة صغيرة فانيلا
- رشة ملح
(هي تحط زيادة wine vinegar)


* للتشيزكيك

- جبنة فيلاديلفيا (8oz)
- بيضة وحدة
- ٣ ملاعق ونص سكر
- ملعقة صغيرة فانيلا


الطريقة: 

ترا صدق طعمها زي ما تقول لورا 

(out of this world delicious)

جربوها، وعليكم بالعافية ❤️❤️

Halloumi Courgette & herb Cakes

هذا الشي قد شفته أكثر من مره بس ما قد فكرت أسأل إيش هو بالضبط، إلى أن شفت الشيف Gordon Ramsay يطبخها مره وأعجبتني. عبارة عن جزر وكوسا وجبنة حلوم نخلطهم مع بيض ونسويهم على شكل برجر، ما أعرف إيش تتسمى بالعربي بس إنها نوعا ما تعتبر برجر للنباتيين وأمي تقول إنها قريبة من عجة البيض، فكيفكم سموها اللي تبون.

بعد ما ذقتها عرفت ليش النباتيين يعتبروا ناس صحيين، صدق هالأكلة واللي تعتبر عندهم "برجر" لذيذة وخفيفة وصحية ما فيها دهون وخرابيط، بس يعني الوسطية زينه بعد ناكل صحي ونخرب شوي وناكل دهون وين المشكلة 😝❤️

الطريقة: 

* بشرت حبة جزر وحبة كوسا في المبشرة وحطيتهم في مصفاة ورشيت عليهم ملح (الملح يساعد في إنهم ينشفوا ويطلعوا مويتهم) بعدين بديت أعصرهم شوي بيدي لأنها لازم تكون بدون مويتها تماما لأن الموية الكثيرة ما راح تخليها تتماسك وتاخذ شكل البرجر. 

* بشرت جبنة الحلوم وأضفتها على الجزر والكوسا بعد ما صفيتهم، هنا وقبل ما نضيف البيض يحتاج تذوقوا كيف ملحها لأنها صعب تتملح بعد ما تستوي. 

* أضفت بيضة وحدة وشوي فتات خبز (بقسماط) وقلبتهم سوا ( هنا الشيف رامزي أضاف أعشاب ممكن تضيفوا اللي انتوا حابين نعناع، ريحان، أوريقانو، روزماري، بازل، أي شي تحبوه أفرموه شوي وأضيفوه مع الخضار والجبنة) 

* تشكلوها زي البرجر وتدخلوها الثلاجه نص ساعة قبل لا تسووها، بعدين في المقلاية شوي زيت و تحطوا البرجر، تحتاج يمكن ٥ دقايق أو ألين تحمّر من الجهتين على نار متوسطة مو عالية عشان لا تحمّر بسرعة وهي ما استوت. 

وبالعافية ❤️.. 

Cranberry Orange Cookies

تعرفوا كيف الواحد تجيه فترة يشتهي شي معين ويقعد هالفترة كلها وهو ياكل منه؟ أنا هالفترة طايحه في التوت المجفف حابته بشكل مو طبيعي. من حسن حظي، شفت مقطع في اليوتيوب للجميلة Laura Vitale في Laura in the kitchen تسوي كوكيز بالتوت المجفف والبرتقال😍 تلقائيا تخيلت طعمها بفمي حسيت إنها بتكون شي لذيذ، فَ شي طبيعي إنها تكون من ضمن القائمة.

طريقتها سهله مرة ما تاخذ وقت مجرد إنكم تخلطوا المقادير سوا وتدخلوها الفرن ١٠ دقايق وبعدها تستمتعوا بوحدة من ألذ وأفضل أنواع الكوكيز اللي قد ذقتها بحياتي إذا ما كانت أفضلهم للآن❤️❤️❤️. يعني من جد قد ما أتكلم ما راح أقدر أوصف لكم طعمها "خورااافة خورافة❤️".

الطريقة:

راح أكتب لكم المقادير وأنزل الفيديو أسهل لكم، وعموما هي ما تحتاج شي بس نخلط المقادير سوا وتكون جاهزه. هالمقادير راح تسوي لكم عجينة كوكيز ساده جاهزه أنتوا ممكن تضيفوا أي شي حابينه عليها لو ما تبغوا التوت والبرتقال.
أنا عن نفسي حبيت أضيف شوكليت مع التوت والبرتقال لأنه من وجهه نظري إيش الكوكيز من غير الشوكليت!!

المقادير: 

- كوب ونص دقيق أبيض
- بيضة وحدة (لو ما تحبوها سميكة نفس حقتي، تبغوها سائلة أكثر أو مفرودة ممكن تضيفوا بيضة ثانية)
- ثلث كوب سكر أبيض
- ثلث كوب سكر بني
- إصباع زبدة
- ملعقة صغيرة فانيلا
- نص ملعقة صغيرة بيكربونات الصوديوم
- نص ملعقة صغيرة ملح
- توت مجفف (حسب الرغبة)
- قشر برتقال (حسب الرغبة)
- قطع شوكولاته الكوكيز (حسب الرغبة) 

وبالعافية ❤️..

Ratatouille

السبب في إني اخترت الراتاتوي أو الراتاتولي ضمن قائمة يضحك شوي بس معليش ولا أخلي شي في خاطري من مدري كم سنة 😂. 

الصدق هو إني لما شفت فيلم (Ratatouille) حق الفار الطباخ في آخر الفيلم جاهم الناقد يذوق أكلهم فطبخ له الفار الراتاتوي وأعجبته مره، من وقتها وأنا مشتهيتها ودي أذوقها 😂🙈. 

طبعا حطيتها من ضمن القائمة بس ما أعرف كيف ممكن أسويها يعني مستحيل إني أكون عرفت الطريقة أو المقادير من الفيلم، فتحت أدورها في النت بس ما أعجبتني وصفاتهم ما يحطوا خضار زي الناس بس يحطوا طماطم وبطاطس والخيار مدري الكوسا الطويييلة حقتهم، فالحل الآخر للموضوع إني أروح أقول لأمي اخترعي لي طريقة لو سمحتي المهم إني أبغى شكل الخضار مصفوف في الصينية زي اللي في الفيلم😁.

(في الصورتين الفرق بين راتاتوي الفيلم والراتاتوي حقنا)

مرحلة شراء الخضار كانت أصعب شي، ساعة ندور أنا وأمي في السوبرماركت نختار جزر  بنفس حجم الباتنجان، بنفس حجم الكوسا، بنفس حجم البطاطس، كله عشان يصير شكل الصينية نفس اللي ببالي 😂. 

(أدري إني بثرة بس معليش أهلي لازم يستحملوني، و قاعده أطبخ لهم غدا بعد يعني في مني حسنة) 

الطريقة:

* قطعت البصل، والبطاطس، والكوسا، والجزر، والباتنجان كلهم حلقات أو شرائح، رصيت البصل من تحت في صينية مدورة ورشيت عليه فلفل أسود، بعدين رصينا الخضار فوقه (نفس الصورة).


* في المقلاية حطيت شوية زيت وحمرت بصل وثوم وحبة ماجي وملح وفلفل أسود بعدين حطيت صحن لحم مفروم الين يستوي، بعد كذا أخذنا لحم المفروم وصرنا نوزعه بين شرائح الخضار في الصينية.


* آخر شي فكرت أمي إنها تخترع تتبيلة فوق هذا كله بدال صلصة الطماطم اللي يحطوها.
(بكتبه بدون مقادير طبعا لأنه أمي مسويته)
في نفس المقلاية اللي سويت فيها اللحم حطت موية، ملح وفلفل أسود، كاري، كمون، حبة ماجي، ملح ليمون، (وشوي سكر كالعادة) بس صبتها فوق الصينية ودخلناها الفرن.

و بالعافية ❤️..

Fried Zucchini Flowers Stuffed With Mozzarella

زهرة الكوسا مافي أحد معترف فيها عندنا وأتوقع الأغلب ما يعرف إنه في للكوسا زهرة أساسا، لأن محلات الخضار والسوبرماركت يشيلوا الزهرة قبل لا يبيعوها. أنا كنت مع الشعب ما أعرف عنها شي، إلى قبل كم سنة أبوي جابها وقال بذوقكم شي ما قد ذقتوه في حياتكم وطبخها لنا، صح إني ما كنت أحب أغامر وأذوق أشياء مستنكرة وأكلتها بالغصب بس اللي أذكره إنها كانت شي لذيذ❤️❤️. 

قبل فترة وأنا أتفرج على Master Chef شفتهم قاعدين يقلوا زهرة الكوسا بعدين يحطوها فوق خس ويرشوا عليها زيت أو صوص يعني إنها سلطة وتنحسب على الزبون المسكين ب ٤٠ دولار! 

وأنا بكل بساطة رحت للفليبيني في السوبرماركت قلت له أبغى زهرة الكوسا، طبعا هو مليون علامة تعجب في وجهه بس راح ٥ دقايق وجاب لي كيسه مليانه يقول تكفي والا تبغي زيادة، ما يدري الشيف رامزي إنه عندنا ناخذها بلاش وهو يبيعها بهالسعر😂. 

 الطريقة:

* اخترت الزهرات اللي لسه فريش (أوراقها برتقالية وقلبها من جوا أبيض) غسلتهم وخليتهم ينشفوا شوي.
(غسلتهم تحت موية مفتوحة عالخفيف وحاولت أفتحها شوي شوي وأغسلها من جوا عشان ما ينكسروا لأنها إذا انكسرت يصير تطلع الجبنة منها)


* حشيتهم جبنة موزريلا (أتوقع هم يحشوها جبنة ريكوتا كمان) الحشوة يحتاج لها كمان دقة وشوي شوي عشان ما تنكسر، بعدين حاولت ألف أطرافهم "أوراقها" عشان أسكرها وما تطلع منها الجبنة إذا جيت أقليها.


* أخر شي قبل القلي نغمسها في بيضة مخفوقة بعدين في البقسماط بعدين نقليها.

وعليكم بالعافية ❤️،،

Eggplant Pizza

الوصفة لقيتها في pinterest وحفظت الصورة مع الأشياء اللي عندي في الجهاز تستنى دورها 😂 حفظتها عشان أبوي من عشاق الباتنجان، ولو كل يوم ياكله ما عنده مشكلة فصايره أمي دائما تدور أكلات جديدة بالباتنجان تسويها له وأنا لقيت لها شي جديد لقائمتها😝. 

إلى اليوم كل اللي كان عندي صورة، فاليوم لما جيت أدور الوصفة لقيت إنه بيتزا الباتنجان (مدري هي مخترعتها والا ايش وضعها) بس إنه الوصفة بإسم julia child اللي هي الطباخة اللي في الفليم (julie & julia) . 

الوصفة سهلة خلال نص ساعه تقريباً كانت جاهزة، وطعمها صراحة فاجأني يعني ما كنت أتخيل إنه طعمها بيكون كذا، فيها نكهه لذيذة ما أعرف إيش هي بالضبط، وطعمها بالذات صلصة الطماطم ذكرتني بإيطاليا وأكلهم الجميييل ❤️. 

الغريب في الموضوع إني أنا سارة بنت بسام أقول إنه أعجبتني صلصلة الطماطم 😂، لأنه اللي يعرفني يعرف إنه بيني وبين الطماطم عداوة قوية ما آكله ولا أحب ريحته (طبعا كرهي للطماطم النية واللي تكون قطعها كبيرة ومبين طعمها هذه ما أكلها بس المطبوخة واللي ما يبين طعمها عليها بهارات وأشياء تخفي نكهتها ما عندي مشكله معها😝). بالبداية كنت ناوية أحط لأهلي هالصلصلة وأنا أسوي لي كم حبة بصلصلة البيتزا الجاهزة لأنه على بالي من الصورة إنه الطماطم نية مو مطبوخة، بس لما قريت الوصفة وشفت إنها مطبوخة ومهروسة كمان قررت إني أكلها معهم والحمدلله إني أكلتها❤️. 

الطريقة: (الكمية صغيرة على قد ٣-٤ أشخاص)

* حبة باتنجان قطعتها شرائح عريضة شوي رشيت عليها شوي ملح ورصيتها على مناديل عشان تتصفى مويتها. ( هذه نصيحة julia child) تخلوها تقريبا ربع ساعه بعدين تحطوها بالصينية وتدهنوها زيت زيتون من فوق وتحطوا عليها البهارات الإيطالية (أنا عن نفسي بس حطيت شوي أوريقانو) بعدين تدخلوها الفرن لمدة ٢٥ دقيقة. 
(أنا حسيت شكلها ناشفة وأمي تقول ما عليك منها ما تفهم حطي زيت الزيتون ما فوق ومن تحت 😂بس إني قررت أمشي على نفس الوصفة).

* بالمقلاية حطيت زيت زيتون وفصين ثوم مبشورة، أول ما بدأ يحمر الثوم حطيت حبتين طماطم مقطعة صغار وشوي ملح والبهارات الإيطالية ( أنا ما عندي فحطيت أوريقانو وريحان مجفف) إذا بدأت تستوي الطماطم نهرسها بالشوكة شوي بس مو مره بعدين نرخي النار على أقل شي عشان تقعد حاره إلى أن يستوي الباتنجان، إذا بدأت تنشف الصلصلة نزيدها شوي موية. 
( في إضافة على الطماطم غريبة شوي من اختراع أمي اللي هي سكر تقول دائما اذا بتسوي طماطم لحالها زي كذا حطي سكر ما أعرف السبب بس الصلصلة صارت لذيذة بالأخير يعني ما ضرها شوية السكر).

* لما خلص الباتنجان حطيت عليه صلصة الطماطم وفرمت كم ورقة ريحان وحطيتها عليه وبالأخير حطيت جبنة الموزاريلا ودخلته الفرن من فوق بس عشان تذوب وتحمّر الجبنة. 
( لما خلص الباتنجان عرفت ليه جوليا قالت نحط زيت الزيتون بس من فوق، لأنها تبغى الباتنجان يحمر من تحت وما يصير ليّن مره من كثرة الزيت). 

عليكم بالعافية ❤️..

Baked Potato Chips

"شيبس البيت" كانت أمي تسويه لنا وإحنا صغار، صح ما سوته إلا كم مرة بس عرفتوا كيف لما يظل الطعم الجميل ببالكم❤️❤️. المهم طريقته سهله مره وما تاخذ وقت، وممكن يتسوى بأي نكهه تحبوها.

الطريقة: 

* قشرت ٣ حبات بطاطس وقطعتهم شرائح رقيقة بالمبشرة. بعدين نقعتهم لمدة ٥ دقايق في موية مغلية.

* صفيت البطاطس وقسمتهم ٣ أقسام، كل قسم حطيته في زبديه لحاله. بعدين حطيت عليهم زيت زيتون وملح وفلفل أسود (هذه أساسية) بعدين ممكن تضيفوا أي نكهه حابينها. أنا أضفت خل على الدفعة الأولى، و أوريقانو (زعتر بري) على الدفعة الثانية، و بابريكا (فلفل آحمر مطحون) على الدفعة الثالثة.

* حطيت ورق زبدة في الصينية بعدين رصيت البطاطس حبة حبة جنب بعض ودخلتهم الفرن ما بين ١٠ إلى ١٥ دقيقة.

 وعليكم بالعافية❤️..