تعرفوا كيف الواحد تجيه فترة يشتهي شي معين ويقعد هالفترة كلها وهو ياكل منه؟ أنا هالفترة طايحه في التوت المجفف حابته بشكل مو طبيعي. من حسن حظي، شفت مقطع في اليوتيوب للجميلة Laura Vitale في Laura in the kitchen تسوي كوكيز بالتوت المجفف والبرتقال😍 تلقائيا تخيلت طعمها بفمي حسيت إنها بتكون شي لذيذ، فَ شي طبيعي إنها تكون من ضمن القائمة.
طريقتها سهله مرة ما تاخذ وقت مجرد إنكم تخلطوا المقادير سوا وتدخلوها الفرن ١٠ دقايق وبعدها تستمتعوا بوحدة من ألذ وأفضل أنواع الكوكيز اللي قد ذقتها بحياتي إذا ما كانت أفضلهم للآن❤️❤️❤️. يعني من جد قد ما أتكلم ما راح أقدر أوصف لكم طعمها "خورااافة خورافة❤️".
راح أكتب لكم المقادير وأنزل الفيديو أسهل لكم، وعموما هي ما تحتاج شي بس نخلط المقادير سوا وتكون جاهزه. هالمقادير راح تسوي لكم عجينة كوكيز ساده جاهزه أنتوا ممكن تضيفوا أي شي حابينه عليها لو ما تبغوا التوت والبرتقال.
أنا عن نفسي حبيت أضيف شوكليت مع التوت والبرتقال لأنه من وجهه نظري إيش الكوكيز من غير الشوكليت!!
المقادير:
- كوب ونص دقيق أبيض
- بيضة وحدة (لو ما تحبوها سميكة نفس حقتي، تبغوها سائلة أكثر أو مفرودة ممكن تضيفوا بيضة ثانية)
- ثلث كوب سكر أبيض
- ثلث كوب سكر بني
- إصباع زبدة
- ملعقة صغيرة فانيلا
- نص ملعقة صغيرة بيكربونات الصوديوم
- نص ملعقة صغيرة ملح
- توت مجفف (حسب الرغبة)
- قشر برتقال (حسب الرغبة)
- قطع شوكولاته الكوكيز (حسب الرغبة)
وبالعافية ❤️..
ليست هناك تعليقات:
إرسال تعليق