الريزوتو طبق إيطالي مو مرة متعارف عليه عندنا، أتوقع لأن عندنا أنواع رز كثير ما نحتاج نوع زيادة، ولأنه الريزوتو سالفته سالفة يحتاج حوسة شوي وغالبا ما يضبط مو كل الناس يضبط معهم، يعني مو نفس باقي أنواع الرز نكبه في الموية ونتركه الين يستوي، هذا الفرق فيه إننا نضيف الموية على دفعات يعني نضيف ملعقة ونقلبه إلى أن تتبخر بعدين نضيف ملعقة ثانية ونقلبه، وعلى هالحالة إلى أن يستوي الرز تقريبا ياخذ ٢٠ - ٣٠ دقيقة. عشان كذا هند بنت عمي تقول ( هذا ما بتتعلمي منه الطبخ بس، هذا يعملك الصبر).
أنا عن نفسي أعشق الأكل الإيطالي، بس ذقت الريزوتو في إيطاليا مرة وحدة ولا أعجبني فما عاد جربته بعد كذا، من فترة جربته هنا في الرياض في مطعم (جولياز) ومرة أعجبني حقهم، قال لي عقلي أجرب أسويه في البيت، طبعا لأني عارفة إنه يحتاج حوسة شوي قعدت فترة وأنا أدور وأتفرج على وصفات يعني عشان أحاول أضبطه بس الصراحة كانت تجربة فاشلة نوعا ما، الرز صار "مهبوص" يعني ليّن بزيادة وحباته لاصقة في بعض كأنه ناشف وهو المفروض ليّن بس ما يلصق يعني إذا انحط بالصحن ينفرد يعني فيه مرقة شوي.
بالرغم من التجربة الغير ناجحة معي يمكن يضبط مع أحد منكم، بس عن نفسي خلاص اقتنعت إنه صعب ولو اشتهيته مرة ثانية رحت جولياز أكلته عندهم، حتى إيطاليا ما عاد أقدر أكله عندهم لأني إكتشفت إنه الريزوتو أصلا ينطبخ ب (White Wine) في أول دفعة تنحط على الرز وبعد كذا يكملوا بمرقة الدجاج، فإذا سافرتوا انتبهوا من هالنقطة. أبوي يقول ترا حلو اللي طبختيه موب شين بس إنه مو نفس كثافة حقهم يعني أحس إنه في شي ناقص، المرة الجاية جربي تسويه بال (White Wine) وهو صادق يمكن حقهم يضبط لهالسبب ما يندرى.
الطريقة:
* قطعت حبة بصل حمّستها مع زبدة إلى أن بدت تذبل وتحمّر شوي، حطيت عليها كاستين رز مصري وقلبته زين وخليته شوي (يقولون إنه إذا حمسنا الرز يصير يشرب أو يمتص السوائل ومن كذا يصير ليّن ).
* بعدين أضفت مرقة الدجاج على دفعات، إذا نشفت دفعة أضفت اللي بعدها، مع التحريك المستمر (يقولون لمدة ٢٠ - ٣٠ دقيقة) أنا أخذت مني وقت أطول إلى أن استوي الرز وأتوقع هذا هو السبب في إنه الرز صار ناشف مدري لاصق إنه طول على النار.
* في مقلاية، حطيت الزبدة و الفطر مقطع شرائح وملح وفلفل أسود شوي وبعد ما استوى أضفته على الرز.
إذا في أحد بيجربه ويضبط معه يعلمني كيف.. وعليكم بالعافية ❤️
ليست هناك تعليقات:
إرسال تعليق