الفرينش توست من اسمه معروف إنه أصله فرنسي، هو عبارة عن خبز يتغمّس في بيض مخفوق مع حليب بعدين ينقلى بالزبدة، هذه المكونات الأساسية، الباقي إضافات إختيارية لكل واحد وذوقه يعني مثلاً مو شرط بعد ما تخلص نحط عليها شيرة البانكيك، ممكن ينحط عليها عسل، أو سكر مطحون، أو حتى نوتيلا. صحيح إنها تعتبر نوع من أنواع الحلويات بس ألاحظ إنها كثير ما تؤكل الصباح كفطور.
في بعض الدول بالذات في فرنسا يسمى (pain perdu) معناه (lost bread) أو الخبز الضائع. لأنهم غالبا يستخدموا الخبز ثاني يوم (البايت) بدال ما يرموه يعني ما يكون جديد. طبعاً هنا نجي للفرق بين خبزهم التوست وخبزنا، حقهم اللي يكون كامل وهم يقطعوه بالسماكه اللي يبغوها ويكون قاسي شوي بالتالي نوع خبزهم أكيد هو الأضبط للفرينش توست. خبزنا مقطع شرايح رقيقة وليّن عشان كذا غالباً لما نسويه ما يجي يقرمش بالعكس يكون "متشتش" على قولة أمي (يعني ليّن مره كأنه ما استوى).
بعض النصائح اللي سمعتها وممكن تفيد أي أحد راح يسوي الفرينش توست:
١- لا تحطوا حليب وسكر كثير.
يعني المفروض إنه ما ينحط لدرجة إنه البيض يختفي، البيض مهم في إنه يخلي الخلطة تمسك عالخبز و كثرة الحليب راح تخلي الخبز لين لدرجة إنه ممكن يتفتت ويخرب، والسكر كثرته راح تخلي الخبزة تحمّر بسرعة حتى لو ما استوت.
٢- لازم تنخلط الخلطة كويس.
اذا ما انخلطت زين وانخلط كل شي مع بعض، عادي جداً إنكم تلاقوا بياض البيض مثلاً على الخبز. عشان كذا ضروري تنخلط كويس.
٣- عند القلي لا تستخدموا الزبدة لحالها.
دائما أصلا إذا جيتوا تطبخوا أي شي لازم تحطوا شوية زيت مع الزبدة وهي تسيح، لأن الزبدة تنحرق بسرعة وبالتالي الخبز بيصير أسود بسرعة وهو لسه ما استوى.
٤- انتبهوا لحرارة المقلاية.
اذا كانت حرارتها أقل من المطلوب راح ينشف الخبز ويصير قاسي من الوسط، وإذا كانت الحرارة عالية راح تنحرق أطرافها وهي لسه ما استوت من الوسط. أفضل طريقة لقلي الفرينش توست هي ٣ دقايق من فوق بعدين تقلبوها ٣ دقايق على الجهة الثانية، في درجة حرارة متوسطة.
الطريقة:
* بالنسبة للخبز ممكن تحطوها كاملة، بس كل مرة أسويها أحس إنها تصير مقرمشة من الأطراف بس وبالوسط تقعد ليّنة أو رطبة، عشان كذا هالمرة جربت أقطعها ٤ قطع بالطول وأتوقع إنها كذا أفضل.
* في صحن، خلطت بيضة وحدة مع حليب، ملعقة صغيرة سكر، ملعقة صغيرة فانيلا، وشوية قرفة (طبعاً هذا الشي إختياري، بس عن نفسي أحس إنها فكرة عظييمة)، وزي ما قلت لازم ينخلط كل شي كويس.
(بيضة وحدة مع الحليب كفتني لحبتين خبز توست بس. إذا راح تسوو كمية أكبر لازم تزيدوا الخلطة)
* سخنت المقلاية عالنار وحطيت الزبدة وشوية زيت عشان ما تنحرق، في أثناء ما تسيح الزبدة نحط الخبز في البيض ( ما نحطه قبل عشان اذا طولت الخبزه في البيض يصير صعب نشيلها وبتنكسر مدري تنقطع وتحوسكم)، المهم نحط الخبز في المقلاية، واذا كنتوا مسوين كمية كبيرة لا تزحموهم كلهم سوا حطوها على دفعات عشان يمديها تستوي من كل الجهات.
* أخر شي التزيين، زي ما قلت بالبداية كل أحد يزينها باللي يحبه، عن نفسي زينتها بشيرة البانكيك وقطعت عليها فراولة. و بالعافية ❤️..
❤️ Bon Appétit
ليست هناك تعليقات:
إرسال تعليق