هذه الوصفة ما فيها شي مميز مرة أو شي جديد، بس إنها وحدة من الوصفات اللي شفت صورتها في Pinterest وقت ما كنت أحط القائمة واشتهيتها. تقريبا كل اللي كان عندي صورة ما كان في وصفة أو طريقة معينة لطبخها، فحاولت أسويها بكيفي لأنها زي ما قلت ما فيها شي جديد.
(هذه هي الصورة اللي شفتها في Pinterest)
الطريقة:
* في المقلاية، حطيت شوية زيت و حبتين بصل مقطعة صغير وفصين ثوم مبشور، بعد ما يحمّر البصل حطيت شوية كمون (لأن الكمون من البهارات اللي تحتاج تنطبخ مو زي الفلفل الأسود ممكن ينحط بالأخير) و بابريكا أو ممكن تستخدموا الفلفل الأحمر المطحون إذا تحبوها تكون حارة.
* بعد ما حمّرت البصل والبهارات حطيت صحن اللحم المفروم وقلبته الين يستوي، بعد ما يستوي اللحم أضفت الطماطم المعلبة اللي تجي طماطم مقطعة مع الصلصة (و ممكن تستخدموا صلصة أو معجون الطماطم وتقطعوا معها طماطم طازجة إذا حابين)، قلبتها إلى أن بدأت تنشف صلصة الطماطم بعدين نحط شوية ملح وفلفل أسود وبالأخير نضيف فاصوليا حمراء (أضفتها في الأخير لأنها هي أصلا مستوية ما يحتاج تنطبخ، غير كذا راح تنهرس إذا تقلبت كثير)
* في قدر، حطيت المكرونة تنسلق، بعدين صفيتها من الموية وخلطتها مع اللحم المفروم.
* حطيت المكرونة واللحم في الصينية وغطيتها من فوق بجبن ( أنا خلطت جبنة شيدر مبشورة مع جبن موزاريلا، ممكن تستخدموا أي نوع حابينه)، بالأخير دخلتها الفرن إلى أن تذوب الجبنة.
وعليكم بالعافية❤️..
ليست هناك تعليقات:
إرسال تعليق