الطبق أساسه آسيوي من المطبخ الصيني، لكنه منتشر في أغلب القارات زي أوروبا وأمريكا وأستراليا. وطبعا تختلف طريقته من مكان لمكان كل أحد يغير فيه زي ما يحب، مثلاً ممكن يكون الصوص خارجي في صحن لحاله يتغمس فيه الدجاج المقلي، أو ممكن نسوي الصوص لحاله مع الإضافات من فواكهه و خضار بعدين ينخلط مع الدجاج بعد ما نقليه (ما راح يكون الصوص كثير)، أو ممكن يكون صينية كاملة ويكون الصوص كثير، أنا عن نفسي أفضّل الطريقة الأخيرة 👌.وبما إنه السر في هالطبق هو الصوص اللي عليه فمجرد ما تلاقي وصفة كويسة للصوص راح تضمني طبق ممتاز سواء راح تستخدمي الصوص على دجاج، لحم أو حتى جمبري.عن نفسي دائما كنت أحس فكرة الطبق غريبة، دمج الحامض مع الحلو غريب مره، و ما كنت أتخيل في يوم إنه بيعجبني دجاج عليه صوص حلو لا ومع فواكهه! و لولا إنه عاليه بنت خالتي خلتني أجربه كان إلى يومكم ما ذقته، فشكراً عاليه❤️.في شي لازم تعرفوه عني إني مو مهوسة طبخ ولا كنت أطبخ شي ولا حتى أتابع برامج طبخ يمكن أتابع برامج مسابقات الطبخ زي Master Chef و Hell's Kitchen وغيرها. بس إني دائما إذا شفت شي أعجبني سواء صورة وإلا في اليوتيوب وإلا أحد مسويها أروح أدور الوصفة وأحفظها عندي مو شرط أسويها بس كذا نفسياً لازم أحفظها😂. الوصفة هذه لقيتها في Pintrest، أعجبتني صورة الدجاج فأخذت الوصفة وحفظتها عندي بالجهاز - هالكلام من ٢٠١٣- يعني الوصفة عندي منذ مبطي تستنى الفرج وأخيراً تفضلت وسويتها، والحمدلله إنها ضبطت👏💃.
الطريقة:* قطعت ثلاث حبات أناناس معلب وصفيتها من مويتها ( الأناناس إختياري تبغي أقل أو أكثر أو حتى بدونه كيفك)، حبة فلفل رومي (أخضر)، وحبة بصلة، بعدين رصيتهم في الصينية.* قطعت صحنين صدور دجاج قطع مربعة، بعدين حطيت الدجاج في النشا بعدين في بيضة مخفوقة. بعد كذا سخنت مقلى فيها زيت (الزيت ما يكون كثير لأني بس بحمر الدجاج ما راح أقليه) وحمرت الدجاج فيها، مجرد إنه يتحمّر نشيله مو لازم يستوي لأنه لسه بندخله الفرن، بعد ما يحمّر حطيته في الصينية فوق الأناناس والفلفل والبصل.(اللي يعرف أمي يعرف إنها ما راح ترتاح ألين تضيف أشياء من عندها على أي طبخة قدامها، فهنا تدخلت ورشت شوي ملح وفلفل أسود فوق الدجاج)* نجي للفقرة المهمة (الصوص)؛خلطت ثلاث أرباع كوب سكر، مع ملعقة ملح، و نص كوب خل تفاح أو خل أبيض كله ينفع، و ٤ ملاعق كاتشب، وملعقتين صويا صوص، (واللي حاب يضيف ملعقة شطة أو سومطرة يفلفلها شوي بكيفكم كمان). بس كذا، اخلطوا كل شي زين الين يذوب السكر بعدين تصب فوق الصينية.(عن نفسي أهلي يحبوا الصوص يكون كثير فدبّلت كمية الصوص، هذا الشي إختياري كمان، لكن حسيت إنه صار حلو بزيادة وهنا تدخلت أمي كمان مره وأضافت شوي ليمون عشان تزيد الحموضة، أو ممكن من الأساس إذا راح تزيدوا كمية الصوص الأفضل يتقلل السكر شوي وكل شي راجع للذواقة ذوقوها وحاولوا تضبطوها زي ما انتوا حابين)آخر شي غطيت الصينية بقصدير ودخلتها الفرن لمدة ساعة أو ألين يستوي الدجاج وبالعافية عليكم❤️.
ليست هناك تعليقات:
إرسال تعليق